Гісторыя збс

Наша гісторыя — наш падмурак.

1990ыя

Задзіночанне Беларускіх Студэнтаў стваралася як антыкамуністычная моладзевая арганізацыя напрыканцы 1980-ых гадоў. Арганізацыя, як агульная структура з'явілася рэзультатам працы некалькіх нефармальных студэнцкіх груп, што існавалі ў Беларускім дзяржаўным унівэрсітэце, Мэдыцынскім і Пэдагагічным інстытутах. Ад пачатку свайго існавання ЗБС прымала актыўны ўдзел у штодзённым жыцці студэнтаў, арганізоўвала кампаніі супраць ідэалагізацыі адукацыі, акцыі пратэсту супраць вывучэння гісторыі камуністычнай партыі ў якасці абавязковага прадмету. З 1989 году арганізацыя выдавала газэту "Студэнцкая Думка", якая потым ператварылася ў часопіс і ў 1999 годзе стала афіцыйным незалежным зарэгістраваным выданнем.

У 1992 годзе ЗБС было афіцыйна зарэгістравана ў Міністэрстве юстыцыі Рэспублікі Беларусь як "Рэспубліканскае маладзёжнае грамадскае аб'яднанне "Задзіночаньне Беларускіх Студэнтаў". Васьміпромневая зорка стала афіцыйным сімвалам арганізацыі.

Каманда ЗБС, 1993

Неўзабаве пасля рэгістрацыі ЗБС зладзіла канфэрэнцыю "Нацыянальная вышэйшая адукацыя ў Беларусі" і святкаванне 50-х угодкаў "Беларускага Саюза Моладзі". У першай палове 90-ых у межах культурнай і адукацыйнай дзейнасці арганізацыяй былі выдадзеныя 4 кішэнныя слоўнікі і мэтадалагічная літаратура для мэдыцынскага інстытута, альбомы беларускіх рок-гуртоў і бардаў. Таксама ЗБС аказвала падтрымку беларускім пісьменнікам у выданні кніг. У кастрычніку 1994 году ЗБС арганізавала сустрэчу маладых беларусаў свету, на якой прысутнічалі прадстаўнікі больш чым дзесяці краін.

З гэтага часу Задзіночанне Беларускіх Студэнтаў пачало актыўнаю дзейнасць і ў грамадскай сферы, адстойваючы правы беларускага студэнтства.

Урывак з газеты "Свабода", 1994. Акцыя пры патдрымцы Свабоднага Прафсаюза

У 1999 годзе ЗБС стала паўнапраўным сябрам ESIB (зараз ESU — European Students' Union) — арганізацыі, якая на дадзены момант аб'ядноўвае 49 студэнцкіх звязаў з 38 краін і прадстаўляе больш за 11 мільёнаў студэнтаў. У 2005 годзе міжнародны каардынатар Задзіночаньня Беларускіх Студэнтаў Таццяна Хома была абраная сябрам выканаўчага камітэта гэтай арганізацыі. У 2000 - 2002 гадах ЗБС рэалізавала сумесна з LSvB (галандскім звязам студэнтаў) праект, накіраваны на стварэнне, развіццё і ўмацаванне студэнцкага самакіравання ў ВНУ Беларусі.

ЗБС на Мальце, 1998

2000ыя

Са снежня 2001 года рашэннем Вярхоўнага суда Рэспублікі Беларусь ЗБС было пазбаўлена рэгістрацыі фактычна за актыўнае правядзенне кампаній па сацыяльных праблемах студэнтаў (прымусовае размеркаванне, малыя стыпендыі, старыя падручнікі, недахоп інтэрнатаў і інш.) і мабілізацыйнай кампаніі "Выбірай!", якая заклікала грамадзян Беларусі галасаваць на прэзідэнцкіх выбарах. Суд не звярнуў увагі ні на адсутнасць юрыдычна абгрунтаваных аргументаў з боку Міністэрства юстыцыі, ні на заявы ў падтрымку ЗБС больш за 30 еўрапейскіх студэнцкіх і праваабарончых арганізацый.

К 2001 году ЗБС аб'яднала вакол сябе студэнтаў з усёй Беларусі, налічваючы больш за 1200 чальцоў і гэты час мы упэўнена выйшло на міжнародную арэну, стаўшы аднымі са стваральнікаў Эўрапейскага Студэнцкага Саюза (ESU).

Таксама з 2001 годзе бярэ свой пачатак першы Інтэрнэт-праект Задзіночаньня Беларускіх Студэнтаў — студэнцкі інфармацыйны рэсурс studenty.by. Пасля двух гадоў развіцця сайт ужо ўвайшоў у пяцёрку самых наведвальных беларускіх студэнцкіх рэсурсаў. У 2005 годзе праект стаў незалежным, а ў 2007 змяніў назву на Generation.bY. На дадзены момант сайт з'яўляецца адным з найбольш папулярных беларускіх моладзевых Інтэрнэт-рэсурсаў.

У 2002-2004 гадах ЗБС рэалізоўвала праект "Адкрыты студэнцкі форум. Думкі ўслых", у выніку якога была распрацавана "Дэкларацыя правоў студэнтаў Беларусі". Дакумент распрацоўваўся студэнтамі розных ВНУ Беларусі падчас студэнцкіх форумаў, якія адбыліся ва ўсіх буйных гарадах краіны. Студэнты абмяркоўвалі механізмы абароны правоў студэнтаў, атрымлівалі парады ад юрыстаў, дасведчаных у гэтай галіне, дыскутавалі, якімі павінны быць правы беларускіх студэнтаў.

У 2003 годзе ЗБС зладзіла рэспубліканскі конкурс студэнцкай творчасці "Голая студэнцкая праўда", па выніках якога адбылася выстава (ў 2008-2009 гадах ініцыятыва СтудФармат скарыстала канцэпцыю "Голай студэнцкай праўды" для правядзеньня выставы UnReal Student Life).

ЗБС было ініцыятарам акцыі "Хочам вучыцца па-беларуску!", якая ажыццяўлялася ў 2005-2006 гадах.

Акцыя ля помніка на плошчы Якуба Коласа, Мінск

У 2006 годзе ЗБС супрацоўнічала з беларускімі жаночымі арганізацыямі з мэтай стварэння беларускай жаночай сеткі. У 2006-2007 гадах ЗБС разам з Эўрапейскім Радыё для Беларусі стваралі радыё-перадачу "СтудФармат". Напрыканцы 2006 — пачатку 2007 Задзіночанне Беларускіх Студэнтаў правяло кампанію "Не заганяйся!", прысвечаную інфармаванню студэнтаў аб іх праве адмовіцца ад удзелу ў датэрміновым галасаванні на выбарах. У межах кампаніі быў выдадзены мультымедыйны дыск з песнямі беларускіх гуртоў і тэматычнымі флэш-мультамі. У 2007 годзе СтудФармат ператварыўся ў самастойную ініцыятыву.

У 2006 годзе ЗБС сумесна з Беларускім Хельсінскім Камітэтам праводзіла кампанію "Ільготы кожны дзень", у межах якой збіраліся подпісы за ўвядзенне ільготнага праезду для студэнтаў на працягу ўсяго каляндарнага года.

У 2007, калі было абвешчана пра скаванне ільготаў на праезд, ЗБС разам з іншымі моладзевымі арганізацыямі ўдзельнічала ў пратэстах супраць адмены ільгот.

Магілёўскія актывісты пратэстуюць супраць адмены льгот

Адным з важных накірункаў дзейнасці ЗБС заўсёды было выдавецтва. У 1999 годзе ЗБС распачало выпуск "Студэнцкай газеты", якая стала распаўсюджвацца па ўсёй Беларусі. У 2007-2008 навучальным годзе газета выходзіла не толькі ў папяровай, але і ў флэш-вэрсіі. У 2008 годзе Задзіночанне Беларускіх Студэнтаў правяло конкурс вершаў на студэнцкую тэматыку "Незавершанасць", па выніках якога быў надрукаваны зборнік.

На працягу ўсяго існавання прыярытэтнымі накірункамі дзейнасці ЗБС былі культурніцкі і адукацыйны. Задзіночанне Беларускіх Студэнтаў арганізоўвала канцэрты, сустрэчы з творцамі, літаратурныя вечарыны. Таксама ЗБС надавала вялікую ўвагу нефармальнай адукацыі, арганізовала навучанні ў разнастайных галінах — ад курсаў спеваў да міжнародных семінараў, прысвечаных Балонскаму працэсу. Добрай ЗБСаўскай традыцыяй стала правядзенне летнікаў і краязнаўчых вандровак.

2010ыя

#Студэнтысупраць
#Студентыпротив
#Studentsagainst